Dunay magsige’g wakwak tungod sa ilang balay magabii ug mao kini karon ang gipangandaman ni Tibong. Si Julia nga iyang asawa gibati na'g kahadlok labi na inig kahuma'g tingog sa wakwak.
Tungod niini, iyang gisultihan ang duha niya ka anak nga ulitawo nga sila si Ariston ug Marlon nga dili gyod magpakagabii og dugay.
"Aw, katilaw gyod na nakong ungoa na," ni Tibong sa kalma nga tingog. "Kana ra bang akong pistola kanunay ko nang gihinisan ug gilimpiyohan, dili gyod na mosipyat.
Ang ilang silingan nga si Tomasa-Milong dunay anak nga dalaga nga guwapa kaayo ug kini mao si Anastacia. Daghang mga ulitawo nga naibog sa dalaga apan mao lagi hilomon kini siya ug halos dili kanunay'ng makita nga manaog sa ilang balay. Kini sila si Tomasa ug Milong gidungogdungog nga kaliwat og ungo apan nahilom man lang pod paglabay sa lima ka tuig. Apan karon mibalik ang pagsige'g wakwak. Kausa samtang naglakaw si Marlon nga nagsubay sa dalandalan paingon sa ilaha, may mitingog nga wakwak didto sa itaas sa lubi, dayon mitugpa kini. Usa ka babaye ug nakaila si Marlon, iyang gisangpit, "Anastacia, ikaw man lagi na, ikaw ang ungo?"
"Oo, bag-o pa lang kong nahimong ungo kay husto na man ko sa edad," hinay'ng tingog sa dalagang ungo.
"Sayang, ibog man unta ko nimo," ni Marlon nga mipahiyom..
"Mahadlok diay ka nako, Mar?" ni Anastasia nga natandagan sa kahayag sa buwan. Guwapa kaayo ang dalaga.
"Wa, wa uy, dili ko mahadlok nimo, uy,"mipahayag ang ulitawo. Miduol ang dalaga kang Marlon ug gisakwat ni Anastacia si Marlon ug dayon milupad siya dala ang ulitawo.
"Sus, nindota diay kun nia ta sa taas, hangin kaayo. He, he, he, duna na gyod koy uyab nga ungo," misinggit si Marlon.
"Ayaw baya'g panabi, ha, Marlon, sekreto ni nato," ni Anastacia nga mipasidaan sa ulitawo. (KatapOsan)