Paspas ang lihok ni Tingoy ning hapona. Dali niyang gibiyaan ang iyang gitrabaho, bisan og wala pa kini mahuman.
Kauban kami nga nagtrabaho sa usa ka furnityuran, diri sa Mandaue apan lahi ang among departamento. Bisan sa kasipat ning akong silingan, apan naninguha gyud ko nga ako siyang mapasulod sa akong gitrabahoan. Kay sa didto pa kini siya sa probinsya, maghilak ang semana kung dili mapatawag sa barangay ang iyang inahan.
Oy, di kaha ka magmahay anang imong gibuhat Yong? Sagkaw ni mama usa ka gabii niana. Kana ra ba si Tingoy pastilang daghana og kabuang. Apan way nahimo si mama kay nadala gyud nako si Tingoy nianang pagka Lunes sa buntag.
Magtulo na ka buwan sukad ko gikuha ni Tingoy sa among lungsod. Nalipay na lang ko nga anaa siya tipon nako. Ug dili na sab kaayo ko madak-an sa abangan. Usahay dili mi magka kuyog inig paingon ug pauli gikan sa sa trabahoan, apan dihay mga higayon nga nagkuyog mi og sakay. Apan nakabantay ko dili ni moplite sa among masakyan nga 22D.
Ning hapona niuna siya nako’g pauli kay may gitiwas akong unit nga gilihaan. Dugay siya nga nakasakay og jeep paingon sa among abangan. Nagligas lang ang among panagsakay, nauna siya og gamay. Pag-abot gyud tungod sa among nauganan, miaginud ang jeep nga iyang gisakyan, timaan nga manaug na siya. Apan wala pa gani, madapat iyang usa ka tiil sa yuta. Mihagtik na iyang tangkogo sa kumo sa konduktor. Dugay na diay kini niyang gipanid-an si Tingoy nga mamukong. (Katapusan)