Gula 52
"Sige, sige, sulayig kulata ikaw pay nangabit animala ka ikaw pay isog ug mangulata. Ayaw ko'g hadloka!," si Gina nga mi-atraka usab sa bana.
"Husto na lagi intawon mo ana ma, pa," ni Carlo nga pwerting pugong sa amahan nga buot mokulata sa asawa. May mga silingan nga midugok ug ang uban milili sa bintana nangosyuso sa away. Mabati pa nga adunay nag-ingon nga 'naabot na diay si Gina gikan sa gawas sa nasud ug aduna say nag-ingon nga nahibawo na man si Gina sa kabuang anang iyang bana. Sa nabati ni Carlo, dali kining milingi sa mga tawo nga nag-iyahay pagpanglili diha sa ilang bintana.
"Kun mahimo nang, noy..pamahawa mo diha away pamilya ni, " paghangyo pa ni Carlo sa mga nangosyuso.
"Unsa man mo? Moambit mo?!," matud pa ni Arturo sa mga silingan nga way laing mahimo gawas sa pagpamantay.
"Sige na Carlo, panghiposa na ang imong mga gamit," mando sa inahan kang Carlo.
"Sige Carlo, kun mouban ka sa imong inahan pakasamaha nga wala na kay amahan isipa nga patay na ko," matud pa ni Arturo.
"Nganong kinahanglan pa man nga maglalis mo ana?" Pangutana pa ni Carlo sa amahan ug inahan mipadayon sa pag-ingon ang ulitawo, "ma, kun mahimo hatagi una ko'g igong panahon aron sa paghuna-huna ining tanan," hangyo sa ulitawo sa inahan.
"Sige, sa sunod adlaw mobalik ko dinhi ug kinahanglang mouban kana nako," matud pa ni Gina. "Makigbuwag na gyud diay kang papa?." pangutana sa ulitawo sa inahan.
"Oo makigbuwag nana siya kay nakakita na siguro na siya'g arabo nga maoy iyang gipuli nako," sagbat pa ni Arturo.Pakkkk!.. Laing pagpiti na sab sa dagway ni Arturo nga gitamparos ni Gina.
"Nanghinobra kanang animala ka ha," pag-atake ni Arturo kang Gina apan daling nakababag ug miuwang si Carlo sa amahan kay nahibawo siya nga kausa lang sumbag niini sa amahan ngadto sa iyang inahan malukapa na kini kay dakong tawo si Arturo.
"Ayaw ipamahid ang imong mga binuhatan animala ka!" Matud pa ni Gina nga daling nakakuha sa sandal ug ipokpok unta ngadto kang Arturo.
"Ma, husto na, husto na, sige lakaw na lang moapas ra ko nimo utang buot husto na intawon mo kay midugok na'g maayo ang mga silingan," hangyo ni Carlo sa inahan. Maayo gani kay naabot ang iyaan ni Carlo nga igsoon sa iyang mama, gipugos kini pagpagawas gikan sa balay.
"Husto na manang dali na gawas na gikan dinhi,"matud pa ni Fe nga igsuon niini.
"Sige tiya, palihug ko kay basin mahinaykan siya ni papa ug ikaw pa, lakaw na lang sa imong kwarto," matud pa ni Carlo, maayo gani kay mipatoo ang amahan kaniya dali kining misulod sa kwarto. Ang inahan niini gidala sa iyang iyaan human sa maong panag-engkwentro nahawan na sab ang mga tawo nag-iyahay pagpauli nga wa gyuy laing mahimo mao ang pagpangosyuso ug pagpamantay. Dihang nalinaw na milingkod si Carlo sa lingkuranan sa sala nagunit ang duha ka kamot sa iyang ulo. Wala mahibawo unsay angayang buhaton giilogan sa iyang amahan ug inahan pipila ka minuto mibarog kini. Nakadesisyon nga sudlon ang amahan sa kwarto niini nakita sa ulitawo ang amahan nga naglingkud sa hilit sa iyang kama nagunit ang duha ka kamot sa ulo. Miyanghag si Arturo aron tan-awon kun kinsa ang misulod sa iyang kwarto.
"Misulod ka man? Biyaan sad ko nimo?" matud pa sa amahan.
"Gigutom ka pa?"pangutana sa anak, miduko ang amahan.
"Wala dali Carlo, tupad nako sa paglingkod," ni Arturo ug mihikap sa kilid sa iyang gilingkuran nga buot nga adto molingkud si Carlo. Milingkud si Carlo tupad sa amahan mipadayon sa pag-ingon si Arturo, "kinsa man karon ang imong sundon?
Asa ka mouban? Nako o ngadto sa imong inahan?", mga pangutana ni Arturo miduko si Carlo, nagtigom og igong kadasig ug kusog aron matubag niya sa husto ang pangutana sa iyang papa. (Sumpayan)