35 ka tuig na ang milabay dihang gibanlas sa kusog nga baha ang balay ni Dencio, lab-as pa sa iyang panumdoman ang mga panghitabo wala pa mapakli ang samad nga gihambin diha sa iyang dughan, gimahay niya ang iyang kaugalingon wala siya'y nahimo aron pagluwas sa iyang asawa ug anak nga niadtong tungora nagpakitabang kini kaniya samtang giguyod sa kusog nga bul-og sa tubig baha.
Nibiya si Dencio sa maong dapit ug nanimpalad sa siyudad diin giswerte siya. Nakatrabaho siya ug nakapundar og balay ug yuta ug may awto pa.
Apan haw-ang gihapon ang kinabuhi ni Dencio. Naglaom siya nga sa umaabot, makita niya pagbalik ang iyang asawa ug anak. Unya, Pasko na ug samtang naglimpyo sa iyang sakyanan may mga bata nga nag-away duol sa nahimutangan ni Dencio, nag-ilog sa usa ka singsing.
Giduol ni Dencio ug gikuha ang sing-sing gikan sa nag-ilog niini. Kalit siya gikulbaan sa pagkakita niya sa singsing kay mao kini ang singsing sa ilang kasal ni Erenna, nga iyang asawa.
Gipalit niya ang singsing ug gisundan ang bata nga si Radol nga maoy nagbaligya sa singsing ngadto niya. Nagtakuban si Dencio, isip santa claus. Nagtuo siya nga pinaagi ni Radol, makita niya pagbalik ang iyang pamilya. Nahiabot siya sa usa ka barong barong, diin nakita niya si Erenna iyang asawa, walay kadasig nga naglingkod sa gubaong lantay.
"Ho! Ho! Ho.., maayong pasko kaninyong tanan "ni Dencio, sa dako nga tingog. "Igo lang nitutok ang iyang asawa sa nagtakuban nga santa claus. Unya gihubo ni Dencio ang iyang takuban ug gipagawas ang singsing sa ilang kasal ug gitaod sa tudlo sa iyang asawa," dili pa ulahi ang tanan mahal, atong saulugon pagbalik ang pagsubang sa bag-ong Pasko" ni Dencio, ngadto sa iyang asawa.
Unya inanay nangahulog ang mga luha sa mata ni Erenna, gigakus niya'g hugot si Dencio nga iyang bana ug nisinggit kini sa tumang kalipay. "Anak, mga apo, Radol, dali kamo ania na inyong lolo Dencio matud sa iyang asawa nga si Erenna nga puno sa tumang kamaya. (Kataposan)