Ang managtiayong Magno ug Nalda namaligya'g lamas diha duol sa mga karaang kahoy nga nangka. Ug may katapad silang naninda'g bugas.
Unya si Magno lang usa ang nibantay sa tindahan kay ang iyang asawa tua sa siyudad sa Sugbo nangumpra. Ug may nasiplatan si Magno nga may makililimos nga tigulang lalake nga nangayo'g pagkaon ug tubig sa katapad niyang tindahan.
Apan wa gyud hatagi sa iyang gipangayo ug giabog dalang tukmod. Unya nibalhin kini sa tindahan ni Magno. Ug gihatagan dayon sa iyang gipangayo. Nalipay ang makililimos dayong lakaw sa unahan. Taodtaod may laing nakita si Magno nga nagsul-ob og lubos itom, usa ka babaye nga tigulang nga nahidagma. Iya kining gitabangan ug nilakaw lang sab dayon.
Pagka sunod adlaw ang katapad nga tindahan ni Magno nagmingaw na hangtod nga nabangkaruta. Unya wala hibaw-i Pasko na. Wa paabota nagpakita ang makililimos aron sa pagpangayo'g pinaskuhan. Gihatagan ni Magno og mga sapot.
"Kabuotan nimo, Dong. Sa imo gibuhat pil-on ko kini!", panaad sa makililimos.
Human sa pagsulti takulahaw nahimong palasyo ang karaang kahoy. Dangta'g pipila ka minutos may niguho gikan sa palasyo. Nisiga ang mga mata ni Magno, kay ang niguho usa ka manikin nga naglakaw nga nagdala'g buyot nga nagpadulong kaniya. Napugwat si Magno sa iyang nasaksihan kay ang manikin nagkaanam og kausab ang bayhon hangtod nga nahimong babaye nga tigulang.
"M-Manang, ikaw...?" ni Magno.
"Oo, ako. Sa imong kabuotan angay kang gantihan. Ako kadtong nahidagma nga imong gitabangan!", sa babaye nga tigulang.
"Dong, kadtong nagpakilimos ko nimo usa lang ka pagsuway. Kanang imong giatubang akong asawa. Pulos kami mga engkanto!", sagbat sa dili ingon nato.
"Tinuod kana, Dong. Nagkasabot kami nga ikaw hataga'g pinaskuhan!", sa engkantada. "Sige, ablihi ang sulod sa buyot."
Giablihan dayon ni Magno, unya nasabak sa iyang panan-aw ang mga diyamente ug binaritang bulawan. Ug may gisulti ang engkanto.
"Mao kini ang akong panaad nga pil-on ang imong nahatag kanako!", matud sa engkanto. "Sa imong maayong binuhatan mao kana ang among sinabutan nga pinaskuhan." (Kataposan)