Nahulog ang anak ni Dencio sa lubi ug maayo lang gani kay wala mag-una ang ulo. Didto mohagsa sa lunangan.
Nakuyapan gyod hinuon si Nikoy nga nagpangidaron pag 12 anyos. Ang lubi nga gikatkatan ni Nikoy naa ra sa may kilid sa lunangan diin sa atbang niini naa ang dakong punoan sa kahoy’ng balugo. Gidali dayon ni Dencio pagdala si Nikoy sa manghihilot og albularyo dinhi sa ilang sityo. "Mura'g dunay nagbitad ni Nikoy, Dencio," ni Iyo Pitoy pa nga albularyo ug manghihilot. "di ba hanas man kining bataa mokatkat og lubi...?"
"Oo, Manong Pitoy. Hibulong bitaw ko, nga karon pa man ni mahitabo nga nahulog. Wala pa gyud ni sukad siya mahulog ug bisan unsang kahoy nga katkaton niya," ni Dencio. Unya, may gisulti si Iyo Pitoy. Naminaw pag-ayo si Dencio.
"Dencio, dunay katalignan si Nikoy. Parehas niya'g edad. Usa ka babaye nga anak sa engkanto nga nagpuyo sa kahoy'ng balugo. Kay kun wala pa kini siya bitara sa maong batang engkanto, adto gyud kini siya paingon sa dakong bato tungod sa lubi..." miigham si Iyo Pitoy ug namulong. "O, sige, wala man mapiang si Nikoy. Panguli na mo... kay tua ra ba ron sa inyo ang batang babaye..."
Tuod, nahibaw-an dayon sa magtiayon nga si Nikoy gihatagan og pinaskohan sa usa ka engkanto kay ang ilang lamesa napuno sa lamiang pagkaon, pero way asin. Gatab-ang lang. Pagka gabii sa Noche Buena, nagpakita ang batang babaye nga engkanto. Guwapa kini ug nahigala pod kini ni Nikoy. Dihay kausa human sa Pasko, miadto si Dencio sa dakong punoan sa Balugo ug didto maoy nabantang sa iyang panan-aw ang dakong balay nga mura'g mansion ug didto sab iyang nakita ang batang engkanto, ug nakugang siya kay didto diay si Nikoy kuyog sa batang engkanto, ug nagduwaduwa ang duruha.
Ning tungora midalig pauli si Dencio ug pag-abot nila sa ilaha maoy iyang nakita si Soling nga puwerteng minatay og hilak kay lagi si Nikoy wala na magginhawa nga naghigda sa ilang katre, daw patay na kini. (Katapusan)