Gipabasa ko ni Rafael sa nadawat niya nga text message mao nga misugot ko nga mopauli siya ngadto sa ilang probinsiya sa Negros.
Nianang pagkaugma, milarga dayon si Rafael apan nagsabot kami nga mobalik siya sa Cebu, human sa usa ka semana.
Usa ka adlaw niana, naglain ang pamatyag ko sa akong lawas. Nagsuka ko og pulos laway. Maong nagpahiling ako sa usa ka doktor. Didto akong nasayran nga nagsabak ko. Nagbunga gayud ang gihimo namo ni Rafael.
Tangkud gayud nga usa ka semana sukad sa pagpauli ni Rafael sa ilang probinsiya sa Negros, nahibalik siya sa Cebu.
Gibalita dayon niya kanako nga naalim na ang balatian sa iyang inahan ug nakagawas na kini sa ospital sa iyang paglarga balik sa Cebu.
Human ko niya balitai mahitungod sa kahimtang sa iyang inahan didto sa Negros, ako na usab ang mibalita kaniya bahin sa resulta sa akong pagpahiling sa usa ka doktor. Gitug-anan ko siya nga mabdos ko.
Apan namatikdan ko nga wala malipay si Rafael sa akong gitaho kaniya. “Unsa may atong buhaton niini karon, Rafael?” nako pa. (Sumpayan)