Gula 17
Nabaniog na sa among tulonghaan ang balita mahitungod sa paglugos ni kuya kanako. Tungod sa gibate nga kauwaw, napugos ko paghunong sa pag-eskuyla. Wala na ako mopakita sa among tulonghaan.
Si Mrs. De Teklo, ang among prinsipal, niadto sa among balay usa niana ka adlaw. Nakigsulti siya kanako ug sa akong mga ginikanan. Iya ko nga giawhag nga mobalik pag-eskuyla, ilabi na nga hapit na ang among graduation.
Pero mibalibad ko. Nakahukom ko nga dili na motiwas pag-eskuyla. Wala na ako’y nawong nga ikaatubang sa akong mga klasmit, ilabi na ni Arnel nga dugay na nga nangulitawo kanako.
Nakagusto ra ba unta ako ni Arnel pero wala nako dawata ang iyang gugma tungod kay gusto ko nga mo-concentrate sa akong pagtuon. Unya karon.
Wala makapugos kanako si Mrs. De Teklo. Nakasabot siya sa akong kahimtang. Apan mipadayag gayud siya sa iyang kahinugon sa paghunong nako’g eskuyla.
Usa ka adlaw niana, miduaw na usab sila si Tatay ug Nanay kang kuya Cain sa bilanggoan. Nagdala sila’g pagkaon alang niini. Supak unta sa akong kabubut-on nga dad-an nila’g pagkaon ang salbahis ko nga maguwang, apan wala ko na lang sila badlonga. (Sumpayan)