Gula 16
Samtang didto pa sila si tatay ug nanay sa lungsod, nibisita si Coco sa among balay. Nasabot ko nga mahinungdanon ang iyang tuyo kanako.
“Pasayloa ko sa akong gibuhat kanimo didto sa tubod, Darlene. Gigamhan ako sa kahangol sa unod niadtong higayona mao nga buot ko usab nga angkunon ang imong pagka-babaye,” matud ni Coco.
“Hikalimti na kadto, Coco. Ang importante nga imo kami nga gitabangan niining among problema karon,” giingnan ko si Coco nga mura’g nabuotan.
Igo lang nakabiya si Coco nahiabot sila si tatay ug nanay gikang miduaw kang kuya Cain sa bilanggoan sa lungsod.
Nakamatikod ko nga nagpakita og kahibudngan nga mga lihok sila si tatay Barlo ug nanay Ludy sukad sa ilang pagduaw ni kuya Cain didto sa bilanggoan sa lungsod.
Kanunay sila nga maghinuktok. Mura’g may butang nga nakahasol sa ilang hunahuna. Wala sab sila mosugilon kanako kun unsa ang ilang gipanagsultihan ni kuya.
Naghulat lang usab ko nga mohagad sila pagtug-an kanako. Alang kanako, wala ako’y interes nga manukiduki sa bisan unsa nga butang nga may kalambigitan sa akong igsuon nga miunay paglugos kanako.
Gikasilagan ko siya! (Sumpayan)