Gula 13
Mitidlom sa akong alimpatakan ang gipamulong ni Kris. Ang iyang gisulti gihinuktokan ko sulod sa pipila ka gabii.
Gitimbangtimbang nako’g maayo ang iyang mga pulong kay alang nako, husto ang tambag ni Kris.
Hangtud nga usa ka adlaw niana, nakaumol ako’g usa ka desisyon. Pagkahapon sa pagpauli nako sa akong klase, wala si kuya Cain sa balay.
Nakahigayon ko sa pagpakigsulti ni nanay Ludy ug tatay Barlo ug gitug-anan nako ang akong mga ginikanan sa gibuhat ni kuya Cain kanako.
Nakalitan pag-ayo sila si tatay Barlo ug nanay Ludy sa akong gitug-an kanila. Akong nasabot nga maglisod sila sa pagtuo nga makahimo si kuya Cain sa paglugos kanako.
Apan ingon sa nakatugkad usab ang among mga ginikanan nga nagsulti ako sa matuod. Mihilak si nanay, kaha naluoy sa akong kahimtang.
“Kanus-a lang kini nahitabo, Darlene?” Sukit sa akong amahan. “Hapit na moduha ka semana, Tay,” laktod nako nga tubag.
“Ngano nga karon ka man lang misulti niini kanamo?” pangutana ni nanay.
Ako sila nga gipasabot nga nahadlok ko sa bahad ni kuya Cain nga patyon ko niya kun may tug-anan ko sa iyang gibuhat kanako. (Sumpayan)