Bisan sa bata pa ko, ganahan na g’yud ko'g Rolex nga relo, apan tungod sa kamahal di g’yud makaabot ang akong tinigum. Kutob ra g’yud ko sa pagpangandoy.
Sa college na ko, naghandom gihapon ko'g Rolex. Sige lang ko’g balik sa tindahan og relo aron motan-aw. Usa ka higayon, samtang naglakaw ko paingon sa tindahan, may nasigpatan ko nga bata nga nangukay og linabay nga pagkaon su’d sa basurahan.
Gihakop sa kaluoy ang akong kasing-kasing. Nahunahuna nako ang kapait kun kami’ng magsuon, ingon pa niini ang kahimtang. Giduol ko ang bata ug giingnan nga pakan-on nako siya sa kan-anan nga kinaham sa mga bata nga may mura’g dako’ng buyog sa pultahan.
Nalipay kaayo ang bata nga mikuyog kanako. Nabusog kaayo si Atoy sa gi-order ko nga pagkaon. Apan nakabantay ko nga nagsige siya’g pasiplat sa subra nako’ng pagkaon. "Ako na na bi kay dad-on nako para ni mama," matud ni Atoy nga nagtudlo sa subra ko’ng pagkaon.
Mura’g gikumot ang akong kasingkasing. Dili ko makatuo nga sa edad nga 6-anyos, kahibawo na siya'ng maghunahuna sa iyang minahal sa kinabuhi. Sa wa’ pa motulo ang akong luha, nidali ko'g tindog ug nagdugang pag-order og pagkaon nga dad-on ni Atoy sa ila. Nigakos si Atoy sa akong paa sa kalipay.
"Buotan lagi ka, imo pa g’yud mi pinangga, Ginoo ka?" natandog g’yud ko ni Atoy. Gikan niadto, kanunay na nako nga pakan-on si Atoy kun ako siya nga makit-an samtang moduaw ko sa tindahan aron pagtan-aw sa Rolex nga relo. Pabawnan pa nako siya og pagkaon inighuman.
Paglabay sa katuigan, wala na kami magkita pa si Atoy. May nakasulti nako nga human mamatay ang inahan ni Atoy, wala na usab nila makita ang bata. Nangligid ang daghang katuigan.
Usa ka adlaw, hapit na ang Pasko, samtang nagkaon ko sa among suki nga kan-anan ni Atoy kaniadto, may awto nga nihunong.
Usa ka lalaki nga nagbarong, migawas. Mitutok ang tawo kanako. Gikulbaan ko kay nagpahiyom kini nga niduol nako, ug nigakos!
Gihubo sa tawo ang iyang relo nga Rolex ug gitunol nako. "Para imo g’yud na uncle. Ako g’yud na nga gipalit kay kahibawo ko nga ganahan kaayo ka ana. Imo baya ko nga giingnan sa una."
Wa ko katingog. "Nalimot na ka nako uncle sa?” "Tay’m pa sa dong, mahal baya ning reloha. Pila ma'y baligya nimo ani?" matud ko. Mipahiyom ang lalaki. "Human kana og bayad uncle... sa imong pagpakaon nako sa una diha nga bata pa ko." (Kataposan)