Gula 1
Gigutom si Cesar mao nga miadto siya sa night market sa dalan Colon aron mokaon. Samtang namili og pagkaon si Cesar sa naglinya nga baligyaanan og pagkaon, nadani siya sa maanyag nga tindera nga miabi-abi kaniya ug miagni nga anha lang mokaon sa ilang tindahan.
Puwerte nga nakatutok ni Cesar sa dalaga nga sa iyang pagbana-bana kapin pa lang sa 18-anyos ang pangedaron. Tuod, didto sa mao nga kan-anan si Cesar miorder og pagkaon.
Samtang nagpaabot nga maluto ang giorder nga pagkaon ni Cesar, gitagbaw niya ang iyang mga mata sa pagtutok sa maanyag nga tindera. Makaduha gayud ka higayon nga nagkasugat ang masi’g ka tinan-awan nila ni Cesar ug sa tindera.
Nakabantay si Cesar nga mura’g wala na mahimutang ang babaye nga nakasabot nga gisigihan siya’g tutok sa iyang kustomer. Diha nga naluto na ang sud-an nga giorder ni Cesar, gihatod na kini sa tindera sa lamesa nga iyang gilingkoran.
“Palihug ko og sili gwaps,” gikomedyahan ni Cesar ang maanyag nga tindera dungan sa pagpahiyom kaniya. Mibawos pagpahiyom ang tindera diha nga gisangpit niya og gwaps.
Pagbalik sa tindera nga nagdala na sa sili, gipahimudsan g’yud dayon ni Cesar ang higayon. Iyang giila-ila ang babaye pinaagi sa pagtug-an og una sa iyang ngalan.
Wala magmakuli sa pagtug-an sa iyang ngalan ang babaye samtang gilamano ni Cesar. Gikan niadto, adto na kanunay mokaon si Cesar sa tindahan nila ni Alma.
Kanunay nga si Alma maoy moabi-abi kang Cesar kun moadto kini sa tindahan. “Kutob ra baya mi ugma dinhi sa Colon kay nahuman na ang termino sa night market nga gihatag sa City Hall,” giingnan ni Alma si Cesar. (Sumpayan)