Dear Tita Salie,
I’m Mrs. Michiko of Argao, Cebu, 38 years old. Bahin sa akong mister ang akong patambagan nimo. Karong bag-o lang akong nasayran nga aduna siya’y kairing-iring sa ilang gitrabahoan. Gisakitan ko. Maayo kaha nga akong sukmatan ang akong bana? Pasabta ko.
* * *
Dear Mrs. Michiko,
Ang pagdakin-as sa usa wala magpasabot nga dili na siya kasaligan. Kini mahitabo tungod kay kita mga dili hingpit. Kun duna kay nasayran bahin sa imong bana, pakig-estoryai siya sa maong butang uban ang kalumo. Unya pamalandonga ang giingon sa Filipos 2:4 nga nag-ingon: “nga nagatan-aw dili lang sa personal nga interes usab sa uban.” Nagpasabot kini nga dili lang mga butang nga maayo sa iyang kaugalingon ang tagdon. Ang pagtinahoray sa matag kapikas sa kaminyoon mao kini ang paagi sa paghatag og kunsiderasyon ug pagpasidungog sa usa’g-usa. Kay kun wala’y pagsinabtanay, posible gayud nga motungha ang problema nga ingon niini. Importante nga hiusahon ang inyong panglantaw sa kinabuhi, tahuron sa usa’g-usa ang matag desisyon nga dili malapas ang balaod sa Diyos. Ayaw paglangan sa pagsulbad niini. Hinumdomi, ang imong pagduol dili aron pagsukmat o makiglalis, moduol ka uban ang tinguha nga masulbad kining inyong problema aron padayon ninyong mahuptan ang usa ka malipayon pamilya. - Tita Salie