Gula 91
Taudtaod na nga misulod si Chief Inspector Dindo Raval sa CR, apan wala pa g’yud kini migawas. Nakahunahuna si Nicko sa pag-agpas niini sa CR.
Apan sa nagdangadanga na siya sa may pultahan, nadungog ni Nicko nga may gikasulti ang hepe didto sa sulod. Naikag siya sa pagpaniid.
Naminaw siya. Miipli siya sa kilid sa pultahan nga mikang-a og diyutay ug makita niya ang hepe didto sa sulod. Nadungog kaayo niya ang gipamulong sa hepe nga mura’g may gikasulti sa cellphone.
“Basta paabota lang ninyo ang sunod ko nga mando,” sa hepe pa ngadto sa gikasulti niini. “Bantayi lang g’yud ninyo’g maayo nga dili makaikyas ang bata. Kinahanglang ikahalad nato kanang bataa sa atong Dios.”
Sa nadungog ni Nicko gikan sa gipamulong sa iyang hepe, nasabtan niya nga si Chief Inspector Raval mao diay kini ang pangulo sa Bangkulis Black Brotherhood nga nagdagit sa iyang anak ug asawa.
Dihadiha gilanit niya ang iyang pistola ug mikalit pagsulod sa CR. Nakalitan si Chief Inspector Raval nga niining tungora naggunit pa sa relo nga Rado nga mao diay ang gigamit niini nga himan sa komunikasyon.
Daw wala magdahom ang hepe nga mahitungha si Nicko sa sulod sa CR. (Sumpayan)