Gula 89
Lawom kaayo ang paghuna-huna ni SPO1 Nicko Bernal. Nablangko ang iyang kaisipan taliwala niining dako niya nga problema. Wala siya masayod kun unsa ang angay niya’ng buhaton karon aron maluwas ang iyang asawa ug anak nga gidagit sa mga sakop sa kulto nga Bangkulisan.
Paghiabot nila sa Tinago gipatawag dayon ni Chief Inspector Dindo Raval ang tanang polis sa lungsod ug gihatagan og kamandoan nga suhiron ang kinatibuk-ang lungsod aron sa pagpangita sa mga sakop sa kulto.
“Paminaw kamo’g maayo, niining higayona kinahanglang doblehon na gayud nato ang atong paningkamot nga matultolan ang dapit diin nag-imbudo ang mga sakop sa kulto. Kinahanglang matultolan nato ang ilang gitagoan karon g’yud nga adlawa. Nag-ungaw sa kakuyaw ang kinabuhi sa asawa ni SPO1 Bernal nga atua karon sa ilang mga kamot,” matud sa hepe.
Apiki ug lisud kaayo nga tumanon ang mando sa hepe. Usa kini ka imposibleng misyon. Apan wala maningog ang mga polis.
Gipadayag sa hepe ang iyang mga plano. Iyang ipasiksik ang tanang hilit nga bahin sa Barangay Sun-ok. Mao kini ang gidudahan sa hepe nga maoy dapit nga gilubloban sa mga sakop sa kulto. (Sumpayan)