Matud sa hepe nga nahibulong siya pag-ayo ngano nga natultolan man sa mga sakop sa kulto ang gitagoan sa anak ni SPO1 Nicko Bernal.
“Nagtuo ko, Sir nga gisundan kita sa mga Bangkulisan sa pagpaingon nato sa lungsod sa Naatang diin didto nato tagoa ang bata,” ni Nicko.
Miadto gilayon sila sa Naatang aron pagsusi sa nahitabo. Ang hepe maoy nangunay sa pagmaneho sa sakyanan ug dali ra sila nga nahiabot.
Tuod man, maoy misugat sa ilang panan-aw paghiabot sa dapit ang upat ka polis nga wala na’y kinabuhi. May agi sa pinusilan ang ilang mga lawas nga nagbuy-od sa tugkaran sa resthouse. Nakapanglingo ang hepe sa ilang nakita.
Si Nicko milahos pagsulod sa rest house. Abiyerto na ang pultahan. Iyang gipangita si Gelli, apan wala na didto sa sulod sa resthouse ang iyang asawa. Nagtuo na g’yud si Nicko nga giapil pagdagit sa mga Bangkulisan si Gelli.
“Wala na dinhi si Gelli, Sir. Gilakip usab siya pagdagit sa mga sakop sa kulto uban sa akong anak,” matud ni Nicko.
“I’m sorry, Nicko. Gikasubo ko pag-ayo kining hitaboa. Nagtuo ko nga luwas ang imong anak dinhi. Apan...” (Sumpayan)