Gitanyagan ni Ramon si Kenn nga siya lang momasahe niini aron pagwagtang sa kakapoy nga mihakop karon sa iyang kalawasan. Wala motingog si Kenn apan nagpahiyom kini nga mitutok kang Ramon.
Giundangan ni Kenn ang pagkaon sa ice cream nga gipalit ni Ramon. Giandaman niya’g coffee ang iyang bisita. Human makakape si Ramon, dungan usab nga nahurot ni Kenn ang usa ka cup nga ice cream.
“Paborito g’yud nako ang chocolate ice cream Mon. Tan-awa, mura’g nahuwas-huwasan ko nga nakakaon sa ice cream,” matud sa dalaga nga nagpahiyom.
Nahilom sila kadiyot. “Unya, sure ka nga masahean ko nimo Mon?” gisukna ni Kenn si Ramon samtang nagpahiyom. “Aw, Oo,” pwerte’ng abtika nga nakatangdo ni Ramon nga wala g’yud magdahom nga tinud-on ni Kenn nga magpamasahe kaniya.
Mitindog si Kenn gikan sa gilingkoran niya nga sopa. “Tana, ari lang ko sa kuwarto nako masahii. Pero wala ra ba ko’y panghaplas,” matud ni Kenn. Mopalit unta si Ramon sa atbang apan giingnan siya ni Kenn nga siya na lang ang mopalit.
“Ako na la’y palit Mon kay magduda unya sila ngano nga magpalit ka’g panghaplas unya mosulod ka’g balik sa balay,” pasabot ni Kenn. Diha nga nakabiya na si Kenn paingon sa tindahan, gipasundan kini paglantaw ni Ramon. Napahit niya ang iyang ngabil nga nagsud-ong sa kabigot sa lawas sa dalaga.
Wala madugay, nabalik si Kenn nga nagdala na sa panghaplas. Misulod sila pagbalik sa kuwarto. (Sumpayan)