Gula 63
Ang maestra nga si Mrs. Tommi miingon nga ang iyang tinun-an mibiya sa iyang balay lapas ang kilum-kilom aron mopauli na sa ilang panimalay.
“Sa ato pa, ngitngit na nga mipauli ang bata. Nag-inusara ra ba siya sa iyang pagpauli?” sukit ni SPO1 Nicko Bernal.
“Siya ra’ng usa, Sir. Naanad na man gud kadtong bataa nga mag-inusara ra pagpauli bisan gabii na. Karsada man ang iyang subayon paingon sa ila,” ni Mrs. Tommi.
Miyangoyango si Nicko. Unya pagkilab sa pipila ka daklit, mipadayon kini sa pagsukitsukit sa magtutudlo.
“Sa iyang pagbiya gikan sa imong gipuy-an, wala ka bay namatikdan nga may tawo o mga tawo nga nagsunod kaniya nga kadudahan ang mga lihok?”
“Wala g’yud, Sir,” pintok nga tubag sa magtutudlo.
Sa gihatag nga mga tubag sa magtutudlo, wala’y nakuha nga lead si Nicko a aron mailhan ang nagpatay sa bata nga si Jennylyn Melca.
Tapos sa dugaydugay nga panagsultihanay, mitindog na si Nicko ug nanamilit.
Mibiya ang mga polis sa tunghaan.
Sa pag-abot nila sa police station, gihinuktokan ni Nicko ang nahitabo. Upat na ka bata’ng babaye ang gipatay sa lungsod sa Tinago ug pulos natawo sa Septiyembre 8. – Sumpayan