Sa wala pa ipadayon ni SPO1 Nicko Bernal ang sunod niya nga pangutana ngadto sa maestra nga si Mrs. Biangca Tommi, gitutokan usa niya’g maayo ang panagway niini.
Namatikdan ni Nicko nga ingon sa miluspad og diyutay ang nawong sa magtutudlo. Diha’y taphaw nga pagtugkad ang kaisipan ni Nicko kalabot sa gipakita nga reaksiyon sa maestra.
“Ikaw ang gikuyogan sa bata gikan sa eskuylahan kagahapon. Tinuod ba kini?” mipadayon si Nicko pagpangutana.
“Ti-tinuod kana, Sir,” mubong tubag sa magtutudlo.
“Matud pa sa nakakita, ikaw ang nakit-an nga kataposang gikakuyog sa bata nga gipatay sa buhi pa kini. Unsa may giadto sa bata sa inyo?” sukit ni Nicko.
“Nabatasan na ni Jennylyn, Sir, ang pag-adto sa balay matag hapon inigpauli gikan sa klase. Gawas nga klasmet niya ang akong kamanghoran nga anak, managhigala pa gayud sila.
Sila kanunay ang magtambayayong sa paghimo sa ilang assignment,” matud ni Mrs. Tommi.
“Gikan sa inyong pinuy-anan, unsa nga orasa siya nga mipauli paingon sa ilang balay?” pangutana ni Nicko.
“Mga alas 6:30 na man tingali kadto, Sir,” sa magtutudlo pa. -- Sumpayan