Gula 61
Tuod man, gipakigkitaan nila ni SPO1 Nicko Bernal ang magtutudlo nga giingong maoy giubanan sa bata sa wala pa kini gipatay.
Giadto kini sa mga polis sa tunghaan nga gialagaran niini. Naabtan nila kini nga nagleksiyon sa mga tinun-an. Wala lang kini nila tugawa.
Apan ang magtutudlo ingon sa nakasabot nga siya’y tuyo sa mga polis. Mihunong kini pagleksyon sa mga bata ug mitagad nila ni SPO1 Bernal.
Wala maglangan si Nicko. Gisultihan niya ang maestro sa ilang tuyo. Nagpakisayod sila kalabot sa bata nga gipatay.
Maayong mitagad si Mrs. Tommi kanila.
Aron sila magkasulti’g maayo, gidala sa maestra ang mga polis didto sa library sa eskuylahan. Nanglingkod sila nga nag-atubang.
Mao ra’y nag-ulang kanila’ng duha ni Nicko ug ni Mrs. Tommi ang usa ka lamesa. Ang laing mga polis nagpalayo lang kanila apan namati sa ilang gipanagsultihan.
“Unsa man untay akong ikaalagad kanimo, Sir?” sukit sa magtutudlo. “Gusto lang unta ko nga makakuha’g pipila ka kasayoran gikan kanimo, Ma’am,” ni Nicko pa.
“Nasayod ka na man tingali nga gipatay ang usa sa imong mga pupil nga si Jennylyn Melca.” Mitando si Mrs. Tommi. (Sumpayan)