Suod nga managhigala sila si Danilo ug Steve apan managlahi ang ilang baruganan sa kinabuhi. Matinabangon ug mahigalaon si Danilo apan baliktad ang pagkatawo ni Steve.
Usa ka adlaw niana, giduol sila sa bata nga makililimos ug nangayo’g kuwarta. “Wa ra ba koy sinsiyo dah!. Sunod na lang!” ni Steve pa ngadto sa bata. “Dia, boy ..ipalit ni og makaon nimo ha!” ni Danilo pa dayong tunol sa tibuok P100. “Ah!... grabeha pud nimo bay!... tibuok man g’yud!” ni Steve pa nga mura’g gianugnan.
“Okey ra bay!.. dia pa man ko’y nahabilin. Mas nanginahanglan kadtong bataa sa maong kuwarta,” ni Danilo sa mapaubsanon nga tingog. “Porbida pud bay! Ang akoa lang ba kay maanad kanang mga bataa,” maymay ni Steve sa higala.
“Ikalipay ko ang pagtabang sa uban ug wala ko mangandoy nga mahimong adunahan niining kalibutana bay Steve. Kitang tanan dinhi mga lumalabay lang,”pasabot ni Danilo.
“Ambot lang nimo bay!” ni Steve pa nga galingo-lingo. Dili kay kadto ra ang maayong buhat ni Danilo. Daghan na sa iyang mga higala ang iyang natabangan.
Tungod niini, wala gayud siya makatigum samtang si Steve daku na og natigum tungod sa batasan nga tihik ug magpabuta-bungol lang sa mga nanginahanglan og tabang.
Pangandoy ni Steve nga mahimong adunahan. Tulin ang paglabay sa panahon, usa ka dili maayong panghitabo ang miigo sa managhigala. Nanirado ang kompaniya nga ilang gitrabahoan.
Tungod niini, nagkalisudlisod si Danilo kay wala man kini natigum samtang si Steve wala ra kaayo maapektahe kay may igo man kini nga tinipigan maong waldas diri waldas didto si Steve.
Apan gitabangan ra si Danilo sa iyang mga higala ug gipasulod siya og trabaho nga maayo’g suweldo. Si Steve sa pagpunay og lipay-lipay hangtud nga nagkasakit ug halos galubog na lang sa higdaanan.
Nagbasol si Steve kay wala na gayud siya’y masangpit nga mga higala. Giduaw ni Danilo si Steve pagkasayod niya sa kahimtang sa iyang suod nga higala.
Gidala niya kini sa doktor, gipatambalan ug gipalitan og mga tambal. Gipasaligan ni Danilo nga ipasulod niya si Steve sa kompaniya nga iyang gi-alagaran kun mamaayo na.
Dihadiha, nanglugmaw ang mga lusok sa luha ni Steve uban ang paghinulsol.
“Salamat gayud kaayo bay. Usa ka gayud ka matuod nga higala. Dili diay kuwarta ang importante niining kalibutana ug dili diay kini maoy matuod nga bahandi,” mibakho si Steve nga nakaamgo na kun unsa ang matuod nga bahandi. (Kataposan)