Dear Tita Salie,
Just call me Rose. Patay na ang akong una nga bana ug nagminyo ko’g utro apan nakonsimisyon ko sa ikaduha nako nga bana kay kun mahubog magpataka la’g yawyaw. Sakit kaayo’g sinultihan nga makapahiubos. Apan kun dili hubog maayo ra man siya. Mangayo lang ko’g tambag kun unsa’y maayo nako nga buhaton aron kun mahubog siya dili ko sakitan sa iyang ipangsulti diri nako.
Maayong adlaw Rose,
Maayo na lang kay dili tanang panahon siya mahubog. Kun dili siya hubog anha diha nga pahimuslan nimo nga imo siya nga estoryahan ug pasidan-an nga kun mahubog siya molakaw ka lang aron dili makabati sa iyang yawyaw. Ang kasulatan (Proverbio 22:24, 25) nagaingon ayaw pagpakig-uban sa tawo nga masuk-anon, ug sa tawo nga dali nga mosilaob sa kaaligutgot aron dili malit-ag ang imong kalag.”
Nagpasabot kini nga likay una samtang anaa ang imong bana sa impluwensiya sa alcohol. Apan bisan pa niini ang (1 Pedro 3:1) nagaingon: “Kamong mga asawa magpasakop gayud sa inyong mga bana, aron nga kun aduna may dili masinugtanon sila makabig ra. — Tita Salie