Gikumbinser si Fatima sa opisyal sa kapolisan nga mo-execute og affidavit aron nga gawas sa kaso nga administratiba, pasakaan usab nila og kaso nga kriminal si Elmer adto sa piskaliya.
“Kay ngano, dili na ba g’yud diay makapiyansa sila si papa ug mama nako sir?” gisukna ni Fatima ang opisyal nila ni Elmer. Igo ra nga milingo-lingo ang opisyal, dayon nakapangagho.
“Naluoy ko kanimo day, apan kapin sa 200 gramos nga shabu ang nakuha namo gikan sa inyong gipuy-an mao nga dili na makapiyansa pa ang imong mga ginikanan,” matud sa opisyal.
Naguol kaayo si Fatima. Gitug-anan niya ang opisyal nila ni Elmer nga daku kaayo ang kantidad nga ilang gibayad kay gipasaligan man siya nga makapiyansa ra ang iyang ginikanan.
Mihilak si Fatima nga naghuna-huna nga gitugyan gani niya kang Elmer ang iyang pagkababaye bugti sa kagawasan sa iyang inahan ug amahan. “Mao kana nga kinahanglan nga mopirma ka og affidavit kay tinud-on nato kini’ng kasoha. Angay ka nga makabawos sa polis nga bilyako!” matud sa opisyal.
Naglibog kaayo si Fatima. Apan sa ngadto-ngadto nakumbinser ra gayud siya nga moisyu og pamahayag pinaagi sa affidavit nga nagbatbat sa binuhatan ni Elmer kaniya.
Pagkasunod adlaw, gipasakaan si Elmer og kaso nga kriminal (Extortion) didto sa piskaliya. Pagkaugma, sayo sa buntag miadto pa si Elmer sa balay nila ni Fatima sa Dulho.
“Salbahis ka nga pagka polis!” gisingkahan ni Fatima si Elmer samtang mihangyo nga isibog ang gipasaka niya nga kaso.
Unya, may duha ka tawo nga miabot. (Sumpayan)