Milingkod si Nicko atubangan ni Chief Inspector Dindo Raval.
“Unsa diay tuyo mo kanako, sir?” pakisusi ni SPO1 Nicko Bernal.
“Nagtuo ko nga mga sakop sa usa ka kulto ang responsable sa pagpatay sa tulo na ka bata dinhi sa atong lungsod,” sa hepe pa.
Nakalitan si Nicko sa iyang nadungog. Wala siya magdahom sa teyoriya nga moabot sa huna-huna sa ilang hepe. Wala magtuo si Nicko nga ingon niini ang pangagpas sa ilang hepe. Wala siya makatugkad kun unsa ang gibasehan sa hepe sa maong teyoriya.
“Ngano nga nakaingon ka man sir nga mga sakop sa usa ka kulto ang nagpatay sa tulo ka bata?” pangusisa ni Nicko.
“Tungod niini,” sa hepe nga mibira sa hunos sa lamesa ug gikuha ang libro nga itom, dayon gipatong niya sa lamesa.
Nakurat si Nicko. “Ang libro kana nga among nakuha sa dapit diin naugkat ang ikatulo’ng bata nga gipatay! Kay unsa man diay kanang libroha, sir?”
“Doktrina kini sa usa ka kulto. Ang tanang unod niini nga basahon mao ang doktrina nga gitamod sa Kultong Bangkulis Black Brotherhood,” pintok ang tingog sa hepe.
“Bangkulis Black Brotherhood?,” nakasukna si Nicko kay karon pa siya makadungog niini nga organisasyon. - Sumpayan