Kalit nahinumdom si SPO1 Nicko Bernal sa libreta nga nakaplagan nila ni PO3 Roy Cañares sa ulohan sa bata nga gipatay didto sa baybayon sa barangay Lawis.
Iya kining gikuha gikan sa gisudlan nga plastik ug gipahimutang sa ibabaw sa lamesa sa hepe. “Gidala kini namo sa pamasin nga makatabang sa among imbestigasyon,” ni Nicko.
Wala motingog si Chief Inspector Dindo Raval. Mitan-aw siya ni Nicko ug gipunit ang gamay’ng libro. “Puwede ba nga dinhi una kanako kining libroha? Gusto lang ko nga magsusi kun unsa’y sulod niini,” sa hepe.
“Puwede, sir. Kuhaon ko lang unya kana kun ugaling ako na nga kinahanglanon alang sa akong imbestigasyon,” matud ni Nicko.
Human sa ilang panagsulti, migawas si Nicko sa buhatan sa hepe. Sa gawas, gisugat dayon siya ni PO3 Canares.
“Unsa’y sunod ta nga buhaton karon, sir?” nangutana si Roy. Giingnan ni Nicko si PO3 Cañares nga paaboton pa nila ang resulta sa autopsy.
Nianang pagka gabii, samtang nanan-aw sila si Nicko, Gelli ug ang ilang anak nga si Barbie sa salida sa TV diha sa sala sa ilang balay, nasigpatan ni Nicko nga may anino nga naghupo-hupo sa luyo sa koral sa ilang balay. (Sumpayan)