Gula 22
Daklit nga gitutokan ni SPO1 Nicko Bernal ang libro nga diha sa iyang mga kamot. Unya, duna’y misantop sa iyang hunahuna. “Gikahinabi na ba ninyo ang mga ginikanan niining bata nga gipatay?”
“Oo, sir. Pero wala magdugay ang among panagsulti kay nakuyapan ang inahan ug gidali kini nila’g dala balik sa balay,” matud ni PO3 Roy Cañares.
“Pero nakuha na ba ninyo ang gikinahanglan nato nga datus?” ni Nicko.
“Annalyn Rafano ang ngalan sa bata sir, 12 anyos ug natawo sa Septiyembre 8, 1993,” matud ni Roy. Nakugang si Nicko sa iyang nadungog.
Daw liti sa udto’ng tutok nga mibuto sa iyang atubangan. Maglisod siya pagtuo sa gisulti ni Roy. “U-unsa kadto?” nakapangutana pag-usab si Nicko.
Septiyembre 8, 1993 ang natawhan sa bata, Sir. Pareho g’yud sa natawhan sa ubang bata nga gipatay,” ni Roy.
“Kun mao kana, Roy, posible’ng tinuod ang akong pangagpas nga usa ka serial killer ang nagpatay sa mga bata dinhi sa Tinago,” pintok ang tingog ni Nicko. Gidala sa usa ka medico legal officer ang patay’ng lawas sa bata.
Milahos na sila si Nicko ug Roy sa police station. Nag-una si Nicko sakay sa iyang motorsiklo. (Sumpayan)