Gula 2
Nakasakmit g’yud ang kapolisan og daghang shabu sa balay nga ilang gipangronda. Ang labing daghang shabu didto masakmit sa balay diin didto si Elmer miapil sa pagronda.
Didto sa police station, magul-anon kaayo ang pamilya sa magtiayon nga Roda ug Victor kay giposasan sila sa mga polis ug nagkapuliki ang mga news photographers sa pagkuha’g hulagway kanila.
Migawas si Elmer sa opisina diha nga gisugdan na sa pag-imbentaryo ang daghang ilegal nga drugas nga nasakmit sa mga polis. Sa gawas sa police station, nakabantay si Elmer nga may babaye sulod sa usa ka Toyota Hilux nga pickup.
Naghilak ang babaye nga nag-inusara paglingkod sa front seat sa sakyanan. Nasiguro ni Elmer nga pamilya kini sa mga tawo nga nadakpan atol sa raid didto sa Barangay Duljo-Fatima.
Mitukar ang pagka tsikboy ni Elmer, iyang giduol ang babaye. “Hi,” gitimbaya ni Elmer ang babaye. Paglingi sa babaye, pareho sila nga nagkatinutokay.
Nakahinumdom si Elmer nga ang mao nga babaye, mao kadto’ng anak sa magtiayong Roda ug Victor kang kansang balay ilang gironda ug nakuhaan og daghang shabu.
“Imong papa si Victor?” gipangutana ni Elmer ang dalaga nga igo lang miyango ug may luha nga milugmaw sa iyang mga mata.
“Naluoy g’yud ko nimo miss, apan unsaon, igo lang mi nagtuman sa among katungdanan,” pasabot ni Elmer. Si Victor maoy usa sa pangabaga sa giilang drug lord sa Duljo.
“Unsay paagi nga makabuhi ra si papa? Bahala’g may kaso basta dili lang siya mapriso,” matud sa dalaga nga anak ni Victor. (Sumpayan)