Gula 40
Human nako mahimamat ang tag-iya sa balay, nanaka na kami si Venus sa taas. Milahos mi sa kuwarto aron makailis ug makapahulay na.
Gibati ko’g kakapoy sa una’ng adlaw sa pagtrabaho sa tindahan. Hago kaayo. Nabag-ohan tingali ko sa trabaho nga magsige lang og tindog.
Pero nagtuo ko nga sa ngadto-ngadto maanad ra ko sa maong trabaho. “Nakagusto ka ba sa atong trabaho?” gipangutana ko ni Venus samtang nag-ilis mi’g sapot nga pangbalay.
“Oo, Ngano man diay?” matud ko. “Wala lang. Gusto lang ko nga masayod. Abi mo, buotan baya kaayo na ang atong amo, si Mrs. Ramos?
Dili na siya sama sa ubang employer nga tagdugay mohatag og suweldo.
Kun dili pa siya buotan, dugay ra kong mibiya,” matud ni Venus.
“Regular ka na ba diha?” ako siya nga gipangutana. “Oo. Hapit na ko duha ka tuig diha isip regular employee.” Dayon mihabol kanamo ang daklit nga kahilom.
“Daghang salamat, Venus ha,” nako pa nga migisi sa kahilom.
“Sa unsa, Monica?” Misukit siya.
“Sa imong kaayo. Kun wala ka pa, maglisod g’yud ko’g pangita og kapuy-an.” Nasabot ni Venus nga sensiro ko nga nagpasalamat.
“Ayaw na kana’g hunahunaa,” niya pa. Milungtad og dugay ang among panagsulti. Nasayran ko nga taga Tubigon diay si Venus. (Sumpayan)