Dili mahimo’ng tug-anan ko sila si tatay Arcenio ug nanay Teresita sa matuod nga nahitabo kanako. Nahadlok ko nga tinud-on gayud ni agaw Paulo ang iyang gibahad. Dili ko buot nga adunay dautang mahitabo sa akong mga ginikanan.
Mao nga ang bugtong paagi nga akong nahuna-hunaan mao ang paglayas gikan sa among dapit. Nakahunahuna ko nga magtagotago na lang usa sa Bohol.
Usa ka adlaw’ng Biyernes, wala ko mosulod sa klase sa tanan nako’ng mga subject. Gipanghipos ko ang akong mga gamit. Bug-os na ang akong hukom nga dili na mopadayon pag-eskuwela.
Nagplano ko nga inigkahapon, mosakay ko’g bus paingon sa Talibon. Mo-check in ko sa hotel samtang mangita pa ko’g kapuy-an. May tinigom man ko gikan sa subra sa allowance nga gihatag sa akong mga ginikanan ug kini ang akong gastohon samtang wala pa ko’y trabaho.
Miabot ang kahaponon. Nananghid ko sa akong landlady nga mopauli ko sa Mabini kay weekend na man. Apan lansis ra kadto’ng ako. Wala nako tug-ani ang tag-iya sa boarding house nga dili na ko mopadayon sa akong pagtuon.
Sa terminal, misakay ko’g bus paingon sa Talibon. Gabii na sa akong pag-abot sa Talibon apan daghan pa’ng mga tawo nga nagtikawtikaw sa kadalanan.
Nagpakyaw ko’g tricycle ug nagpahatod ngadto sa usa ka hotel nga nahimutang dili layo sa sentro. Mi-check in dayon ko. (Sumpayan)