Human sa akong valedictory address, milanog ang masipang pakpak gikan sa tanang nanambong sa gipahigayong graduation ceremony sa tanang 4th year high school students sa among baryo. Gibati ko’g dakong garbo nga sa 60 ka estudyante nga migradwar sa pribadong hayskol nga eskuylahan sa among baryo, ako gyud ang nahimong balediktoryan.
Dili matukib usab ang kalipay nga gibati nilang tatay Tobal ug nanay Titay nga milamano kanako sa pagbalik ko na og lingkod sa akong lingkuranan sa tanang migradwar nga mga estudyante. Tupad nako’g lingkuranan sila si Tatay ug Nanay, kay sila man ang parents of the year.
Bisan mibati sila og kaulaw tungod kay simpol lang intawon ang ilang pamiste timaan sa among pagkakabos sa baryo, apan gidasig ko gayud ang akong mga ginikanan sa pagtambong ug paglingkod tupad gyud nako, sa adlaw sa gradwasyon. Kay sa tinud-anay lang, sila si tatay Tobal ug nanay Titay, maoy akong inspirasyon sa kalamposan nga nakab-ot ko karon sa akong pag-gradwar sa hayskol.
Bugtong kong anak nila ni tatay ug nanay sa among baryo sa Cabadiangan. Nagdako ko’s kakabos, tungod kay mga kabos lang nga mag-uuma ang akong mga ginikanan sa among baryo. “Bahala’g usa ray imong polo ug purol nga pang-eskuyla, Dong Jethro, padayon lang gyud sa pag-eskuyla...!” mipasabot si tatay Tobal.
“Agwanta lang gyud ang monas-ginhawa mong pag-eskuyla sa elementarya ug hayskol, Dong Jethro! Paningkamot lang gyud aron makagradwar sa hayskol!” tambag gikan kang nanay Titay.
Gihimo kong inspirasyon ang mga tambag nilang tatay ug nanay. Nagkugi ko aron makatapos gyud ko’g eskuyla sa elementarya ug hayskol. Lalim bay matag Sabado ug Domingo, maninda ko’g hinawob nga dahon sa saging sa among tiyanggihan. Mamayabas ko aron lang pabayloan og papel sa akong mga klasmeyt.
Nag-antos ko’g bawon og kan-ong mais nga sinaksakan og saging, balanghoy ug kamoteng bagon, nga way sud-an gikan sa Miyerkules ug hangtod sa Biyernes. Usahay, putong balanghoy maoy bawon sa eskuylahan. “Ayaw lang mo kabalaka, Tay, Nay! Pinaagi sa kakugi ug paningkamot ko, makagradwar ra lagi ko sa hayskol bisan sa atong kakabos...!”
Ug karon, natinuod gyud ang tanan kong gisaad nilang tatay ug nanay. Nagbunga ang akong kakugi ug paningkamot. Migradwar kos hayskol nga balediktoryan, kay sa gikaingon ko na, ang kabos kong mga ginikanan, maoy gihimo kong inspirasyon sa akong kalamposan sa paggradwar sa hayskol. (Kataposan)