Gula 14
Nakapahiyom nga nagtan-aw ang edaran nga kusinera sa iyang agawon nga si Loreto ug sa pinaeskuwela niini nga si Evelyn. “Kamo’ng duha si Evelyn angayan kaayo mo nga magpares Dong Retz,” matud sa kusinera.
“Salamat kaayo Nang Dading sa imong komplimento nga angayan diay mi nga magpares si Evelyn. Ikaw ang unang mahibawo nga nagkasabot na kami ni Evelyn nga magpakasal human sa iyang graduation,” giingnan ni Loreto ang iyang kusinera.
Nanagko ang mga mata ni Nang Dading nga ingon sa dili makatuo sa iyang nadungog. “Gikomedyahan ba ko nimo Dong Retz?” matud sa kusinera nga puno sa kasurpresa ang panagway.
“Wala ako magkomedya Nang Dading. Si Evelyn maoy una ug katapusang babaye nga gipitik sa akong kasing-kasing ug nalipay kaayo ko kay wala niya pakyasa ang akong gugma kaniya,” matud ni Loreto ug gihagkan niya ang dalaga.
“Hala uy, nagmata ra man diay ko’g buntag nga nagkasabot na man diay mo’ng duha. Kana g’yud Dong Retz, ayaw pagpauwahi sa tren,” sagol komedya ni Nang Dading ngadto sa iyang agawon.
“Puwede ba nga usban ko nimo’g masahe Lyn aron hingpit nga mahanaw ang akong hilanat,” giingnan ni Loreto ang dalaga. Igo lang miyango si Evelyn ug mipaingon na sila sa lawak ni Loreto.
Samtang naghayang si Loreto nga gimasahean ni Evelyn, hinay’ng gigunitan sa ulitawo’ng guwang ang bukton sa dalaga ug mainampingon kini nga gibunlot aron mohigda kini tupad kaniya.
“I love you Lyn. Akong isaad nga lipayon ko ikaw ug dili ka magmahay sa pagsugot nga ako ang mahimo mo’ng kapikas sa kinabuhi,” giingnan ni Loreto si Evelyn dungan sa pagpatik og hawok. Nag-ukobay dayon ang masi’g nila ka mga ngabil sa usa ka matam-ison nga pagminahalay. Mikalit lang og kamingaw ang lawak. (Katapusan)