Gula 1
Sabado sa udto. Nag-inusara ko sa balay kay ang akong tatay ug nanay may giadto sa Tagbilaran City.
Human makapaniudto, mipahimutang ko sa sopa sa sala.
Akong gikab-ot ang remote control nga gipatong ibabaw sa lamesita ug gibuksan ang telebisyon. Mitan-aw ko sa programa’ng Eat Bulaga sa GMA-7.
Wala dangti’g dugay sa akong pagtan-aw sa telebisyon, may nanuktok sa pultahan. Sa sinugdanan gipasagdan ko lang kini kay nalingaw kaayo ko sa salida sa TV.
Apan nagpadayon gayud ang pagpanuktok sa pultahan mao nga gibutang ko ang remote control sa lamesita dayong tindog ug mipaingon sa pultahan aron pagsusi kun kinsa ang nanuktok didto sa gawas.
Pag-abli na sa pultahan, maoy misugat sa akong panan-aw ang bayhon ni agaw Paulo nga nagbarug gawas sa pultahan.
“Naa ba sila si tiyo ug tiya?” Sukit ni agaw Paulo. “Wa pa sila, gaw,” nako pa.
Nangutana si agaw Paulo kun hain ang akong ginikanan ug akong gitug-anan nga tua sila sa Tagbilaran.
Wala motingog si agaw Paulo. Namatikdan ko nga mitutok siya nako ug misangit sa makadiyot ang iyang panan-aw sa akong dughan apan wala lang nako hatagi’g dautang kahulogan ang iyang tinan-awan. (Sumpayan)