Dear Tita Salie,
Ako si Tefny. Bahin sa lovelife kini’ng akong patambagan. Duna ko’y hinigugma nga love kaayo nako siya. Buwag na kami karon kay duna na man siya’y lain. Mahal g’yud nako siya, Tita, mao nga hangtud karon wala gihapon ko ka move on. Gisakitan kaayo ko sa iyang gibuhat.
Nag-work man gud to siya sa laing dapit. Nag-amping ko nga dili makasala sa among relasyon. Naghuwat g’yud ko’g taas nga panahon unya pag-uli niya, Tita, nagdala na siya’g babaye sa ilaha. Puwerte’ng sakita g’yud. Bisa’g unsaon nako’g lipay-lipay, maghilak gihapon ko. Palihug pasabta ko.
Good Day Tefny,
Usa ikaw ka maayo’ng panag-ingnan kun bahin sa gugma. Dalaygon ka kun ikaw ang mahigugma, kay imong gituman ang giingon sa Balaang Kasulatan base sa Corinto 13:4 nga nag-ingon “Ang gugma hataas og pailob ug mahulaton. Ang gugma dili abughoan, kini dili manghambog, dili magpaburot.” Gipakita nimo kini pinaagi sa imong pag-amping sa inyo’ng relasyon. Galing lang kay miabot ang bagyo ug miguba sa inyo’ng relasyon.
Bisan tuod og sakit kini sama sa usa ka samad nga nagdugo apan angay ka nga masayod nga sa kadugayan maayo ra kini bisan tuod og adunay uwat nga magpabilin.
Atubanga ang maayo’ng kaugmaon nga anaa sa unahan kay ang Bibliya nag-ingon nga “Kadtong nagapugas og binhi uban ang mga luha magaani gayud uban ang hugyaw sa kalipay.”