Sulod sa pipila ka segundos, gitutokan pag-ayo ni Loreto ang panagway sa dalagita nga apo sa tiguwang nga mamasurahay ug tigbaligya kaniya og mga scrap.
“Nag-eskuwela pa ba kini siya Noy?” gisukna ni Loreto ang apohan sa bata. Karong tuiga wala na siya makatungha Dong, mogradwar na unta siya sa high school apan naapekehan ko kay gagmay ra ang akong kita.
Nahibaw-an ni Loreto nga ang dalagita anak sa kamaguwangang babaye sa tiguwang mamasurahay og gibilin ra kini kaniya kay igo lang gipaangkan ang inahan diha’ng nanarbaho sa Manila.
“Anugon kaayo no? Guwapa ra kini’ng imong apo Noy,” matud ni Loreto. Mipahiyom ang tiguwang. “Tinuod sir, anugon kaayo kay bisan ang iyang maestra gianugnan kay utokan kini’ng bataa. Unsaon, tungod sa kalisod dili ko makapaeskuwela.”
Nakahuna-huna si Loreto. “Hain ang maayo, ako na la’y mopaeskuwela ani’ng imong apo Noy. Sagot nako ang tanan niya nga gastohan, apil na ang inadlaw nga allowance.”
Dali kaayo nga nakatangdo ang apohan dungan sa pagpasupot og pangutana. “Ikaw diay ang mo-sponsor Dong sa iyang pag-eskuwela. Unsa may iyang himuon, anhi siya nimo motrabaho?” Giatubang ni Loreto ang dalagita. “Mosugot ka ba day nga anhi ka moestar nako.Tabang-tabang lang gud sa paglista sa tinimbang nga mga scrap kun may lugar, pero eskuwela ka g’yud gihapon,” giingnan ni Loreto ang dalagita.
“Evelyn ang akong ngalan sir,” gitug-anan sa dalagita si Loreto sa iyang ngalan.
Wala g’yud maglangan si Loreto. “O dia, dawata kini’ng pasiuna nako nga tabang nimo day,” tuskig kaayo nga tibuok P500 ang gihulbot ni Loreto gikan sa iyang pitaka. (Sumpayan)