Gula 12
Mainampingon nga mibangon si Kenneth gikan sa kama nga gihigdaan nila ni Roland. Gikuha ni Kenneth ang pitaka ni Roland nga gisulod sa bulsa sa karsones samtang ang lalaki puwerte nga pagkahinanok human sa makapoy kaayo nga kumbati nila sa kama.
Wala diay mahanaw sa huna-huna ni Kenneth ang nakita niya nga nag-akal ang kuwarta sa pitaka ni Roland diha’ng mibayad kini pagsulod nila sa hotel sa Fuente Osmeña nga ilang gisudlan. Naniga ang mga mata ni Kenneth kay nag-akal g’yud tinuod ang pitaka ni Roland sa papel de-bangko nga tag P1,000 ug P500.
Gipasiklapan ni Kenneth si Roland ug maayo kini nga paghinanok. Sigurado si Kenneth nga dili na kini dali nga makamata kay gikapoy kini tungod sa ilang nainom nga beer didto sa Mango Square ingon man sa kumbati nila sa kama.
Nagdali-dali pag-ilis si Kenneth sa iyang sinena ug mainampingon nga misul-ob sa iyang sapatos. Giluklok niya ang pitaka ni Roland ug mipaingon na siya sa pultahan. Nakahuna-huna si Kenneth nga kuhaon niya ang mahalong relo ni Roland, apan nabalaka siya nga basin kun mahigmata pa unya kini.
Hinay nga gibuksan ni Kenneth ang pultahan. Nakurat si Kenneth kay miagulo si Roland. Mihinay siya sa paglingi apan nangandam kini sa pagdagan. Nakaginhawa siya’g lawom kay igo ra diay nga mitakilid si Roland apan natulog ra usab kini pagbalik.
Tulin kaayo nga migawas sa hotel si Kenneth dala ang pitaka ni Roland. (Sumpayan)