Gula 179
“Dili lagi ko magdugay didto sa Mindanao, Day Jezebel. Duha ka semana ra’y gihatag ni Mrs. Lim nga bakasyon nako,” matud ni Manang Ester. “Gusto lang ko’ng moduaw sa among lugar kay duha na ko ka tuig wa makabakasyon.”
Tuod man, niana’ng pagkaugma milarga gayud si Manang Ester paingon sa Mindanao. Gidoble ko ang akong kakugi kay ako na man lang usa ang naglihok sa balay.
Ako na lay naghikutar sa mga bulohaton sa panimalay sa mga Lim. Hinuon, naanad na ko sa mga bulohaton sa balay maong wala na ko maglisud.
Niana’ng pagkagabii, human sa tanang mga bulohaton sa balay nga akong giatiman, misulod ko sa akong kuwarto sa servant’s quarter. Gibati ko ang kakapoy ug gusto na ko’ng makapahulay.
Gihukas nako ang sinena nga akong gisul-ob. Mihigda ko sa lantay nga nag-“two piece” lang. Gibati ko ang tumang kahayahay sa kaugalingon sa maong kahimtang.
Hapit na ko makatulog diha’ng may nanuktok sa pultahan sa akong lawak. Napugwat ko. Gidali nako’g pangita ang akong sinina ug gisul-ob kini pagbalik.
Mibangon ko aron pagsusi kun kinsa ang atua sa gawas nga nagsige’g panuktok. Pag-abli nako sa pultahan, maoy akong nakita si Red. (Sumpayan)