Dear Tita Salie,
Tawga lang ko’g Mr. Niceguy. Usa ko ka working student. Duna ko’y uyab, 2 years na ang among relasyon. Nindot man ang dagan sa among relasyon bisan tuod masuko ang akong ate nga mag-adtoan ko sa boarding house sa akong uyab.
Sa diha’ng nag-college na ko, diha na nagsugod ang akong problema kay may nakaila man ko nga girl ug nagkauyab g’yud mi. Naglibog ko karon kun kinsay akong pilion kanila’ng duha. Palihug hatagi ko og lamdag kun unsay angay kong buhaton.
* * *
Maayong adlaw Mr. Niceguy,
Ang kasingkasing sa usa ka tawo usa ra, apan mopapitik kini og malimbongong pagbati. Pananglitan karon kun duna kay uyab sa usa ka lugar, unya duna pud kay uyab sa uban pa’ng lugar.
Ang pagpili kun kinsa ang tinuod nga higugmaon, lisud kini nga butang apan dili mahimo nga duha maoy manag-iya sa imong kasingkasing.
Timbang-timbanga pag-ayo ug sulayi ang matag usa kanila kun unsay makita nimo nga maayo nila nga gibuhat alang kanimo. Kadto’ng labing maayo maoy imong pilion nga kapares sa tibuok kinabuhi. - Tita Salie