Gula 171
Human sa pamahaw, milakaw si Mrs. Elvira Lim kuyog si Red nga iyang personal body guard. Kami na lang duha si Manang Ester ang nahibilin sa balay.
“Ikaw lang limpiyo sa lawak ni Mrs. Elvira, day Jezebel,” nagkanayon si Manang Ester. Samtang nagtambayayong mi pagpanglimpyo sa sala.“Oo, Manang,” misanong ko.
“Limpyohi ‘sab og apil ang banyo sulod sa iyang kuwarto. Ilisi ‘sab ang bed sheet sa iyang kama.” Misaka dayon ko sa taas sa balay.
Gisugdan dayon nako’g panglimpyo ang kuwarto ni Mrs. Elvira Lim. Maoy akong giuna ang banyo. Gisunod nako ang palibot sa lawak.
Gilampasoan nako ang salog ug gitrapohan ang bildo sa bentana nga gikapalan na sa daghang abog.
Human nako’g panglimpyo, mao nay sunod ko’ng buhaton ang pag-ilis og limpyong bed sheets sa kama ni Mrs. Lim. Ilisan usab nako’g punda ang iyang mga unlan.
Pagkataudtaod, may sakyanan nga mihunong sa tungod sa balay sa mga Lim. Midali ko’g gawas sa lawak ni Mrs. Elvira Lim.
Midali ko’g lusad paingon sa sala. Niini’ng tungora, nagsige na’g bosina ang nahiabot nga sakyanan.
Si Manang Ester mibiya sa iyang gibuhat sa sala aron ablihan ang gate. Milili ko sa kilid sa bentana aron pagsusi kun kinsay nahiabot. (Sumpayan)