Gula 164
Milingilingi una si manang Ester sa palibot sa wala pa siya motubag sa akong pangutana. Ingon sa iyang gisuta kun wala bay laing tawo nga posibleng makadungog sa among gipanagsultihan. Milantaw siya ngadto sa garahe. Unya miatubang siya pagbalik nako nga ligdong kaayo ang panagway.
“Abtik kaayo sa babaye kana si Red,” nagkanayon si Manang Ester.
“U-unsa?” Nakasukna ko.
“Palakero kaayo kana'ng lalakiha. Daghan na'ng mga babaye nga gipahilak niya.”
“Diay ba, Manang?”
“Mao kana, Day Jezebel. Gisultihan ko ikaw niini aron ka makabantay. Tingalig nakahunahuna si Red sa pagpangulitawo nimo. Tingalig iya ka sab nga biktimahon.”
“Daghang salamat sa imong pahimangno, Manang. At least, makabantay ka nga ingon diay niana si Red. Hinuon wa man siya mangulitawo nako.”
“Wa pa karon. Pero posible'ng mangulitawo siya nimo sa umaabot.”
“Kun mahitabo kana, Manang, dili na siya makaugpo nako kay nakabantay na man ko sanglit imo na man kong gisultihan bahin sa iyang pagkatawo.” (Sumpayan)