Gikan sa terminal sa Ayala, paspas ang dagan sa van-for-hire nga akong gisakyan uban sa kauban kong mga pasahero. Mikabat sa 19 kaming mga pasahero sa van-for-hire nga pulos paingon sa lungsod sa Asturias. May mga lalake ug babayeng pasahero.
Miagpas ko sa kaubanan kong 15 ka call center agent nga mag-overnight stay sa usa ka matahom nga beach resort sa Asturias. Birthday man gud sa among supervisor area manager nga usa ka babaye ug lumad nga taga lungsod sa Asturias.
Nagkakusog ang dagan sa van-for-hire nga among gisakyan nga mitadlas na sa transcentral highway paingon sa Balamban. Mainampingon kong gikuot gikan sa dala kong gamay’ng travelling bag nga gisudlan ko sa pila ko ka sapot nga pangkaligo, ang gamay’ng imahen ni Senyor Santo Niño.
Naanad man gud ko nga matag biyahe ko’g long distance nga sakay sa nga pasaheroan nga bus sakyanan, dili gyud nako kalimtan ang pagdala sa gamay nga imahen ni Senyor Santo Niño. Hilom kong nag-ampo nga luwas da ang among biyahe niadtong orasa sa gabii.
Apan kalit lang nga nahibulong ming tanan nga pasahero kay naglikoliko na ang kusog nga dagan sa gisakyan namong van-for-hire nga nagtadlas na sa dulhugong dalan sa transcentral highway.
“Nawad-an og brake ang sakyanan!” nadungog namo ang singgit sa drayber. “Senyor Santo Niño, luwasa mi....!” nakasinggit ko sa kakuyaw. Nabatyagan namo nga nabulintang ang sakyanan duol sa Cool Adventure Camp sa Barangay Cansomoroy sa lungsod sa Balamban. Kadaghan mabalitok ang van-for-hire. Nagsinggitay sa kalisang kaming mga pasahero. Maoy naamgohan ko nga nalagpot ko sa gawas ug nahalabay sa kasagbutan nga nagkabiba gihapon sa gamay kong traveling bag. Sus, wa mahitsura ang van-for-hire didto sa ubos. Wa koy tatsa!
Way gisi ang gisul-ob kong polo-shirt ug karsones. Wa koy garas ug piang! Gikuptan ko gihapon ang gamay’ng imahen ni Senyor Santo Niño. Pulos nangaangol ang kauban kong pasahero nga nagping-it sa kasakit. May nagrabehan sa nangaangol nga giluwas sa miabot nga mga rescuers niadtong orasa nga hapit na ang alas-9 sa gabii. Wala tuyoa nga nakatuaw ko niadtong higayona. “Salamat, Senyor Santo Niño nga giluwas mo ako! Salamat nga giluwas mo kaming tanang mga pasahero nga bisan og may nangaangol apan way bisan usa nga nakalas nga kinabuhi...!”
Ug atol ning kasaulogan karon sa Pista’s Senyor, wa ko hikalimti ang paghawok sa imahen ni Senyor Santo Niño sa sulod sa simbahan sa Basilica Minore. Akong pasalamat sa milagrosong bata sa pagluwas niya sa akong kinabuhi sa wa damhang aksidente sa transcentral highway.(Kataposan)