Gula 2
Giingnan si Zeny sa lalaki nga nagpaila nga si Ruben nga siya ang moabaga sa gastohan sa pagpaatiman sa iyang anak tungod kay ang miitsa sa pabuto nga nakapasamad sa anak ni Zeny iya man nga pag-umangkon.
Diha pa mahinumdom si Zeny nga wala diay siya makadala og kuwarta diha nga gidali-dali niya pagsapwang ang iyang anak nga nagkadugo ug gisakay sa ambulansya nga mihatud kanila dinhi sa dakbayan sa Sugbo.
“Walay problema, ako ang mopalit sa mga gikinahanglan nga tambal. Gikasubo kaayo nako ang nahitabo. Unsaon nga wala tuyoa nga midagan ang imong anak ngadto sa karsada nga didto nagpabuto’g rebentador ang akong pag-umangkon uban sa iyang mga amigo,” matud ni Ruben.
Diha nga mihatag na og resita ang doktor nga nag-atiman sa anak ni Zeny, nagkuyog sila si Ruben pagpalit sa gikinahanglan nga mga tambal sa botika atbang ra sa ospital. “Ngano nga ikaw man ang mianhi? Hain man diay ang mga ginikanan sa imong pag-umangkon?” gipangutana ni Zeny si Ruben.
“Patay na ang akong igsuon nga maoy inahan sa bata. Ang iyang amahan nagminyo na usab og laing babaye mao nga ang akong pag-umangkon naa na lang miipon pagpuyo sa akong mga ginikanan,” pasabot ni Ruben. Nakatulog ang bata tungod sa anestisya nga gidapat kaniya nga gitumong aron dili kini bation og sakit samtang gitambalan ang iyang samad sa bukton. Giagni ni Ruben si Zeny nga mag-snack sila og kadiyot sa atbang nga tindahan.
Nasayran ni Zeny nga usa ka seaman si Ruben ug nakahigayon sa pag-uli kay bakasyon kini og unom ka buwan gikan sa iyang trabaho. Nagpakisayod si Ruben kun hain ang bana ni Zeny nga wala man kini makauban kaniya sa ospital. Gitug-anan ni Zeny nga gibiyaan siya sa iyang boyfriend samtang nagmabdos pa siya sa ilang anak. (Sumpayan)