Ngitngit na ang palibot sa paggawas namo ni James sa hotel. Naniga na ang mga suga sa tindahan. Busy kaayo ang dalan sa naghuot nga trapiko.
“Sakay na lang sa akong awto, Jezebel,” sugyot ni James samtang nagbarog-barog mi sa daplin sa dalan nga naghulat og taxi nga akong kasakyan.
“Dili ko,” gibalibaran ko siya. Tingali’g may makakita nato nga nakaila nimo o kanako. Dili ko gusto’ng may magduda bahin nato’ng duha.”
“Okey, ikaw ang mag-igo,” ni James pa dungan ang pagtunol nako’g kuwarta. “Imo ni’ng plite sa taxi.”
“Salamat,” nako pa dungan ang pagdawat sa kuwarta.
Wala madugay, may bakante’ng taxi na nga nagsingabot. Among gipara. Misakay dayon ko ug nagpahatod ngadto sa pinuy-anan sa banay’ng Lim. Sa pag-abot nako sa balay, gisugat dayon ko ni manang Ester.
Nabalaka ko kay seryoso kaayo ang iyang panagway nga misugat nako. Nasuko kaha si Mrs. Elvira Lim nga dugay ko nga nahiuli? Mao kini ang una’ng misantop sa akong hunahuna.
“Maayo kay nia ka na, Day Jezebel,” nagkanayon si manang Ester.
“Ngano man diay, Manang?” Misukit ko. May problema ba dinhi samtang wa ko?” “Wa man hinuon, Day. (Sumpayan)