Gula 11
Paspas kaayo ang paglambo sa ilang gugma ni Val ug Lorena. Wala malilong sa mga ginikanan ni Lorena ang ilang relasyon. “Wala g’yud kami pagsupak dong Val sa inyong relasyon ni Lorena. Nasuta nako nga buotan ka ug angayan g’yud nga mabana sa akong anak,” matud ni Carling.
Nagpasalamat si Val nga gihatagan siya og dako kaayo’ng pagsalig sa mga ginikanan sa iyang hinigugma. “Isaad nako Nong Carling nga maninguha g’yud ko aron mahimong takus nga kapikas ni Lorena kay graduating ra ba siya sa engineering.”
Milabay ang mga adlaw, nahibulong si Lorena kay wala na mo-text kaniya si Val. Sagad g’yud unta nga wala may palta ang pagbayloay nila og text messages. Usa ka buntag, nag-atang og kasakyan si Lorena aron moadto sa iyang tunghaan kay aron sayo siya nga magpa-enrol.
Wala dayon siya mosakay og PUJ paingon sa siyudad. Gisuwayan niya pagpaabot nga moagi ang PUJ nga gimaneho ni Val. Gusto nga makisayran ni Lorena gikan kang Val kun ngano nga wala na kini maka-text kaniya.
Hapit na oras nga nagpaabot si Lorena daplin sa tindahan. Wala mosipyat ang iyang pagpaabot kay diha na ang PUJ nga gimaneho ni Val. Mibarug si Lorena daplin sa karsada aron siya makita ni Val. Apan napasiga ang iyang mga mata kay mihunong man tuod ang PUJ tungod sa iyang gibarugan, apan dili si Val ang nag-drive.
Didto sa luyo misakay si Lorena. Wala siya makasabot sa iyang gibati. Wala siya makaantos, gipangutana niya ang konduktor kun hain na si Val nga dili man siya ang mi-drive sa PUJ. “Tulo na man ka adlaw nga wala mo-drive si Val, mora’g dili na man tingali to mo-drive,” matud sa konduktor. Gikulbaan kaayo si Lorena sa iyang nahibaw-an. (Sumpayan)