Nagpadayon ang hilom nga panagtagbo namo ni James sulod sa akong lawak sa servants quarter. Hangtod nga usa ka adlaw niana, nakahigayon siya sa pagpakigsulti nako atol sa akong day-off. Nagsabot mi nga mag-abot sa usa ka hotel sa downtown.
“Ugmang adlawa na ang akong schedule larga paingon sa Amerika. Tungod sa negosyo ang akong pag-adto,” nagkanayon si James nga masulob-on kaayo ang panagway.
“Maayo hinuon,” mikarat ang akong tingog. “Magpakasal na kita, Jezebel,” matud ni James.
Nakalitan ko sa gisulti ni James. Wala ko masayod kun angay ko ba nga ikalipay ang iyang gipadayag kanako nga magpakasal.
“Hunahunaa una sa makadaghan, James, ang ipakanaug mong desisyon aron dili ka magmahay sa kapulihay.”
“Dili mahitabong magmahay ko, Jezebel. Sukad nga nagkaila ta, mikalit la’g kausab ang tuyok sa akong kalibotan.
“Tingalig nakalitan ka lang?,” ako siya nga giingnan. “Naa na ko sa hustong pangedaron, Jezebel. May igo na ko’ng kabuot busa nasayod ko sa akong gibuhat. Nahigugma ko nimo.”
“Masuko ang imong inahan kun buhaton mo kana... ang pagpakasal kanako.” “Bahala na’g masuko si mama nako.” (Sumpayan)