Nanglabay ang mga adlaw sa panagsuod nila ni Val ug Lorena. Usa ka adlaw, mi-text si Lorena kang Val ug nangimbitar sa pagpatambong sa disco sa ilang sitio sa Barangay Tungkil, Minglanilla.
Wala g’yud magdugay si Val sa pagtangdo kang Lorena kay sa hilom gikalipay pa gani niya nga giimbitar siya og disco sa dalaga. Apan mikalit pagsantop sa iyang huna-huna ang pangutana kun may boyfriend ba kaha si Lorena sa ilang dapit.
Nahuna-huna ni Val nga basin og ma-out of place lang siya kun si Lorena adto ra motagad sa iyang boyfriend. Gipangutana ni Val si Lorena kun may boyfriend ba kini sa ilang lugar.
Dili makatuo si Val diha’ng giingnan siya ni Lorena nga wala siya’y boyfriend ug sila’ng duha ang mag-partner sa disco. Naghinam-hinam si Val nga muabot unta pagdali ang kagabhion.
Tuod, wala pa gani mutikyop ang kangitngit, nagpapuli na si Val sa pag-drive sa PUJ. Mipauli na siya ug naligo, nag-ilis ug nagpahumot. Nag-tooth brush siya ug nanglimugmog og mouth wash liquid.
Sa iyang paglakaw, nagpalit siya’g chewing gum nga mapaak-paak aron nga sa panagsultihanay unya nila ni Lorena, humot kaayo ang iyang baba.
Plano ni Val nga karon na ang panahon nga iyang panguyaban si Lorena. Dugay ra nga nakabatyag si Val nga may pagbati siya sa dalaga ug karon na niya kini daygan sa iyang gibati.
Giteksan ni Val si Lorena ug gipahibalo nga nagpaingon na siya sa ilang lugar. “Sige, sugaton tika sa daplin sa karsada Val,” reply ni Lorena. Naghinam-hinam g’yud kaayo si Val sa sunod nga mga panghitabo. (Sumpayan)