“Oo, manang Ester, migawas ko kagabii sa akong kuwarto. Naglain man gud ang akong tiyan. Nag-miscall ang kalikasan maong mitubag ko sa sugo sa lawas.”
“Diay ba.” “Mao kana, Manang.” Maayo gani kay wala na magdaghan pa’g kuti-kuti si manang Ester. Nakaginhawa ko’g luag. Huh! Abi ko’g mabuking na ang gibuhat namo ni James.
Nakareyalisar ko nga kinahanglan diay nga doblehon ko ang akong pag-amping aron dili makamatikod ang ubang nagpuyo sa balay sa kinawat-kawat nga pagtagay sa lawasnong kalipay namo ni James. Delikado kun mabulgar ang among relasyon ug masayod niini ang inahan ni James. Dili pa ko andam kun mahitabo man nga masayran sa inahan ni James ang among relasyon sa dili pa tukmang panahon.
Nianang pagkahapon, miabot si Mrs. Elvira Lim gikan sa Manila. Gikapoy ang lagas sa biyahe mao nga human sa panihapon, misulod dayon kini sa iyang kuwarto. Gisekreto ko’g sabot ni James.
“Mosulod ko sa imong kuwarto unya, ha,” niya pa. Nakugang ko sa gisulti ni James. Mibati ko’g kabalaka sa gusto niyang buhaton. Tingalig makamatngon si manang Ester inigsulod niya sa akong kuwarto. Unsaon na man lang? Pero maglisod sab ko pagbalibad ni James. -- Sumpayan pa