Gula 4
“Kun mosugot ka Lor, ubanan tika pagpanuroy. Drayber man kini’ng akong konduktor ug mahimo ra nga siya la’y akong papadayonon sa pag-drive,” giingnan ni Val si Lorena.
Igo lang miyango si Lorena nga nagtimaan nga gikalipay niya nga magkauban sila pagpanuroy ug ang iyang higala nga PUJ driver. Tuod, pag-abot nila sa bus terminal sa siyudad, gitugyan ni Val ang pagmaneho sa PUJ ngadto sa iyang konduktor.
“Ayo-ayo bai Val. Pagkasuwerte sa akong amigo uy,” matud sa konduktor ni Val nga nanungog kaniya. Mipahiyom si Lorena nga mipasiklap sa konduktor nga nagsigi og tutok kaniya.
“Dili ka ba mauwaw nga makig-uban nako Lor nga wala man ko makailis og maarang-arang nga gisul-ob?” giingnan ni Val ang dalaga samtang nagpaabot sila’g taxi.
Mideritso sila sa SM City. “Basin baya og nakahasol ko nimo Val ha nga miuban ka nako,” matud ni Lorena nga milingi kadiyot sa iyang amigo.
“Wala g’yud ko mahasol Lor. Ako man gani nga gikalipay nga nakig-uban ka nako kay kinsa ra gud ko nga imong ubanan,” ubos ang tuno sa tingog ni Val.
Miyamiid ug miiknat ang kilay ni Lorena nga mipasiklap kang Val apan giubanan kini og pahiyom. Nagpasabot nga dili siya komportable sa gisulti kaniya sa iyang higala.
Giagni ni Val si Lorena nga mangaon usa sila. Miadto sila sa foodcourt. Pagkahuman, nanuroy sila sa lainlaing dapit sa mall hangtud nga miabot ang kahaponon. Ang ilang pagpanuroy ni Lorena ug Val maoy nakapasuod kanila. (Sumpayan)