Gula 3
Nahibulong kaayo ang bukidnon nga si Berto kun ngano’ng milukat og daghang tiket ang iyang pag-umangkon nga si Elizar.
Dala ang daghang mga gagmay’ng tiket, nanaka sila si Berto ug Elizar sa ikatulo nga andana diin tua mahimutang ang kabaret. Gisugat sila sa gwardiya sa taas ug girekisa kun wala ba sila magdala og kontrabando.
“Kangitngit ba niini’ng kuwarto nga atong gisudlan dong, wala ko’y nakita nga tawo,” hagawhaw ni Berto ngadto sa iyang pag-umangkon.
“Gikan man gud ta sa hayag sa gawas tiyo mao nga wala dayon ta’y makita kay violet man ang gigamit nila nga suga dinhi,” gipasabot ni Elizar ang uyoan.
Bisan og wala sila makakita og tawo apan nadungog nila ang katawa sa mga babaye nga molabaw usahay sa kusog nga tugtog sa musika. Mga sweet music ang gipatugtog.
Pagkataud-taod, anam-anam nga may bayhon na sa babaye ug lalaki nga ilang nakita. Nagsayaw kini nga piit kaayo. Milingkod sila si Berto ug Elizar.
“Sayaw ta sir,” matud sa babaye nga miduol kang Berto. “Dong, makigsayaw nako ang babaye,” giingnan ni Berto ang pag-umangkon. “Sige, tiyo, sayawi unya ayaw kaikog sa paggakus g’yud aron dili ka maalkanse sa bayad,” matud ni Elizar.
“Pero dili nako makita ang nawong ani nga babaye’ng makigsayaw nako dong, ngitngit kaayo,” dason ni Berto. “Gituyo na dinhi sa kabaret tiyo aron dili makita bisan unsay buhaton ninyo samtang magsayaw,” ni Elizar pa nga mipasabot sa iyang uyoan kun unsay buhaton nila sa kabaret.
Gihatag ni Elizar ang 20 ka tiket nga gipalit niya gikan sa counter sa silong sa dayon nila’ng sulod. Giguyod sa babaye si Berto ug bisan dili kaayo klaro apan nakita ni Elizar nga midikit dayon ang babaye sa lawas sa iyang uyoan. (Sumpayan)