Di kaha maayo nga atong bahinan niini si Noy Rudy? Kay sa panultihon pa, bahinon man gani ang Talisay?” ni Ruben ngadto’s iyang duha ka manghud nga sila si Dennis ug Denver.
Nagkuyog sila sa opisina sa kwarta padala sa lungsod sa Dakutoy. Gipadalhan sila’g P6,000 cash gift sa Pasko ni Maria ilang kinamaguwangang igsoon nga domestic helper sa UK. May dalang mensahe nga di ipasaba sa ilang Manoy Rudy, kay wa siya’y iya. Sila rang tulo ana magbahin.
Tag-dos mil pesos sila. Wa lang pabahini si Rudy kay usa ka propesyonal ug dako og kita. Apan nakahibawo sila nga kaduha naospital ang asawa tungod sa sakit sa kasingkasing.
Biyuda na si Maria apan maayong pagkabutang kay way anak. Ug dugay nang domestic helper sa UK. Si Rudy ang ikaduha sa lima ka magsoon. Si Ruben ikatulo nga maoy nagpaabang og mga lawak sa balay nga gibiyaan sa ilang mga ginikanan. Si Dennis drayber og taksi. Si Denver dunay sari-sari store nga gitabangan pagpundar ni Maria. Puro na sila minyo ug may mga anak na nga nagtungha sa elementarya. Si Rudy ang giila nilang tubigtubigan kay usa ka CPA. Apan ang asawa masakiton. Hapit kada tuig maospital.
“Nasayod kong kita ang pinalabi ni Manang Maria. Apan naa ra nato kun malooy ba tang Manoy Rudy,” ni Dennis. “Isip magsoon, naa ra nato kun duna ba tay hunahuna sa kaangayan,” ni Denver.
“Kuhaan lang nato’g tag P500 atong bahin. Aron ihatag natong Manoy Rudy. Maayo na lang nang matampo para palit og tambal ni Nang Almira, iyang kapikas,” ni Ruben.
“Ok kaayo. Alang sa kaangayan. Bisa’g wa maghisgot si Manang nga pahatagan si Noy Rudy, puwede mag tag P1,500 na lang tang upat,” ni Denver.
“Salamat ninyo. Kay wa mo nisupak sa akong nahunahunaan alang sa kaangayan,” ni Ruben.
“Kinsa may mohatud sa bahin ni Noy Rudy?” ni Dennis.
“Kitang tulo. Manaygon ta’s ila. Unya kita ang mohulog og kuwarta niya” ni Denver. Ug nag-apir ang managsuon. (Katapusan)