Samtang naglingkod si Samuel sa luyo nga lingkoranan sa gilingkoran ni Jenny, matag karon ug unya pasiklapan niya ang maanyag nga piniriso.
Unya, wala tuyoa nga nahalingi si Jenny sa mga naglingkod sa luyo nga lingkoranan. Nagkaabot ang ilang mga tinan-awan ni Samuel. Gipahiyuman ni Samuel si Jenny. “Hi, gusto ko nga makig-amiga nimo, puwede?” giingnan ni Samuel si Jenny sa hinay’ng tingog.
Mibawos og pahiyom si Jenny apan wala motubag. “Mikuha si Samuel og gamay’ng papel gikan sa sulod sa gibitbit niya’ng brown envelope ug gisuwatan kini sa iyang ngalan. Dayon gitunol niya kang Jenny.
Milingi pag-usab ang maanyag nga binilanggo ngadto kang Samuel. “Jenny ang akong ngalan,” giingnan niya si Samuel. “Nakaila na ko nimo Jen. Gitan-aw nako ang record sa imong kaso didto sa clerk of court,” matud ni Samuel. “Wala ka ba’y plano nga mopiyansa Jen aron dili ka na mabilanggo samtang magpadayon ang imong kaso?” gipangutana ni Samuel si Jen. “Gusto unta pero wala ko’y kuwarta nga magamit pagpiyansa,” mubo nga tubag ni Jenny.
Gipasaligan ni Samuel si Jenny nga mangita siya’g paagi nga makapiyansa ang bag-o niya nga naamiga. Wala motubay si Jenny sa gisulti ni Samuel kaniya. Mura’g wala’y pagtuo nga tinuod ang gisulti ni Samuel.
Unya kalit lang mitindog ang mga tawo sulod sa courtroom dihang misinggaak ang tingog sa clerk of court nga nagpahibalo nga misulod na ang huwes. Milingkod ang huwes sa iyang lingkoranan ug mimando sa pagbasa sa unang kaso nga husayon.
Wala pa miabot ang parties sa una ug ikaduha nga kaso nga gitakda nga husayon nianang buntaga. Ang ikatulo nga diha sa calendar maoy na-una apan ang abogado igo lang miawhag og postponement sa hearing kay gihilantan ang iyang witness.
Gisunod ang paghusay sa kaso ni Jenny. (Sumpayan)